Pasa berri den urtarrilaren 18an, bisita berezi bat izan genuen ikastetxean. Bailarako Ixiar Braco errugbi jokalaria DBH2ko taldearengana etorri zen eta, bi orduko saio batean, errugbiaren mundura gerturatzeko aukera izan zuten gure ikasleek, bai alderdi teorikotik baina baita praktikotik ere. Ixiarrek kirol munduan izan duen ibilbidearen berri eman zigun: nolakoak izan ziren bere hasierak eta, pandemia eta gero, kapitain paperean inoiz baino indar gehiagorekin bueltatu dela. Argazki eta bideo sorta tarteko, ikasleei errugbiaren sorreraren inguruko pintzelada batzuk eman zizkien, arauen inguruko errepaso bat egin zuten, eta babeserako ekipamendua ere ekarri zuen ikasleek ikusi eta ikutzeko. Bitxikeria batzuk aipatu ostean, Ixiarrek errugbitik zer ikasi duen ere azpimarratu zigun: konstantzia eta esfortzuaren baloreak, talde lanaren garrantzia, aniztasunaren eta errespetuaren balioa eta protagonista paperean ongi sentitzearen lorpena. Gainera, ikasleek ikasitakoa praktikan jartzeko aukera izan zuten herriko frontoian.
Ixiar ere gustura ibili zen eta datorren asteazkenean, urtarrilak 25 LH 6. mailako ikasleengana bueltatuko dela erran digu
Utzi erantzuna